السيرة_النبوية_للأطفال بالعامية
تحكى السيرة النبوية بطريقة بسيطة للاطفال ، وباللهجة العامية حتى تسهل على الأطفال حفظ ومعرفة السيرة النبوية ...
كان يا ما كان ...و ما يحلي الكلام غير بذكر النبي عليه الصلاة و السلام
الولاد الممتازين يقولوا إييييييه ؟؟؟؟ ............ عليه
الصلاة و السلام .... تماااااام !
دلوقتي سيدنا محمد لسه مولود .... و الناس زمان أول لما يتولد طفل جديد ...
كانوا يودوه يعيش في مكان اسمه البادية .. البادية دي مكان واسع وجميل و نضيف ... و اللي يروح هناك جسمه بيبقي قوي و بيكبر و صحته بتبقي حلوة ....
و كانت بتيجي مرضعات ياخدوا الأطفال معاهم للبادية و يرضعوهم عشان يكبروا ...
......جت مرضعات كتير ... ووقفوا يسألوا الناس : حد عنده طفل صغير ناخده معانا البادية و نرضعه عشان يكبر؟؟؟
الناس يقولوا ليهم أيوة إحنا عندنا طفل أهو خدوه معاكم للبادية .... فياخدوه معاهم ..
..........................
والدة سيدنا محمد ...آمنة .... قالتلهم أيوة .. أنا عندي طفل لسه مولود !!!
فيسألوها المرضعات: فين والده اللي هيدفعلنا فلوس ؟ .... تقولهم : والده مات
فيردوا المرضعات : لأ .... مش هناخده معانا ...
يا نهاااااااار ... طب والده و جده يعملوا ايه بقه ؟؟ ... جده قالهم أنا هديكم فلوس ...بس برضه مرضيوش ......
..............................
لكن كان فيه مرضعة ..... اسمها حليمة ..... و كان معاها جوزها .... و ابنهم الصغير ....
و كانوا راكبين حمار ضعيييف و بيمشي براااااااحة
و عندهم جمل ( ناقة )...بتديهم لبن .... كانوا بيحلبوها زي البقرة كده.... بس كانت بتجيب لبن شوية صغيرين خالص ....
كانت حليمة بتدور علي طفل تاخده معاها البادية و ترضعه ..
فمكنتش لاقية ولا طفل تاخدوا معاها ... كل المرضعات التانيين خدوا كل الأطفال ...إلا سيدنا محمد
فقالت خلاص أنا هاخد الولد اللي والده مات !!!!..... قصدها علي سيدنا محمد !
فراحت لوالدته و جده ...و قالتلهم خلاص أنا هاخد محمد معايا .... قولوا : عليه الصلاة و السلام يا أولاد و يا بنات !!!!
.................................................. ...
عارفين ايه اللي حصل ؟؟
حصلت حاجة عجيبة ...
أول لما أخدت سيدنا محمد معاها ....حصلها حاجات حلوة كتير !
لقت الجمل( الناقة ) الضعيف بتاعها الي مكنش بيجيب غير حبة لبن صغيرين .... بقي بيجيب لبن كتيييييير .... و جت تركب الحمار الضعيف بتاعها عشان تروح بيه البادية .... لقيته بقي أقوي ...و بقي يعرف يمشي بسرعة ...
و المرضعات التانيين اللي معاه بقوا مستغربين !! ... و يقولوا إزاي الحمار البطيء بقي قوي جدا ...
لغاية لما وصلوا البادية ...
حليمة كانت عايشة في بيت في مكان اسمه ....ديار بني سعد ....
و كان عندها أرض ... بس السنة دي كانت أرضها ما فيهاش زرع و ماية .... بس العجيب إن أول لما وصلت .. و معاها سيدنا محمد ... الدنيا مطرت .... و الزرع الجميل طلع .... و بقت أرضها جميلة
................................
حليمة قعدت تفكر الطفل ده أول لما جبته معايا ...حصل حاجات حلوة كتير ... الطفل فيه بركة .
..بتخلي كل حاجة حواليه جميلة ......فبقت حليمة فرحانة أوي بسيدنا محمد .
................................
و كبر سيدنا محمد في البادية لغاية لما بقي عنده سنتين ..... و بقي جسمه قوي .
... و أقوي كمان من الأطفال اللي قده .....فكده خلاص كبر ولازم حليمة ترجعه لأمه .
بس حليمة كانت بتحب سيدنا محمد عليه الصلاة و السلام ... و عايزاه يقعد معاها وقت أطول .
فراحت حليمة لأم سيدنا محمد ...
و قالتلها : ممكن تسيبيه يفضل معايا شوية كمان ؟؟؟
مكان جميل و جوها حلو وممكن لو رجع يتعب ...خليه معايا حبة كمان .
و فضلت تتحايل علي والدته ، اللي اسمها ايييييييييييه ؟ ...( آمنة بنت وهب )
لغاية لما وافقت ...
و رجع سيدنا محمد مع حليمة للبادية ....( لمكان بيتها ...ديار بني سعد ).
حادثة شق الصدر:
رجعت حليمة للبادية .... لبيتها اللي في ديار بني سعد ..... ( مع التكرار هتثبت إن شاء الله )
و كانت فرحانة أوي ..... عشان والدة سيدنا محمد وافقت إنه يرجع مع حليمة و يقعد معاها وقت زيادة ......
أنتوا عارفين إن ربنا اختار سيدنا محمد أنه يكون أحسن واحد في الدنيا كلها ... و هيعلم الناس كلها الخير .... ف عشان كده ربنا هيخلي قلب سيدنا محمد أطيب ( أطهر ) قلب.، مليان خير .... و مفيهوش أي شر ....و ما يقدرش الشيطان الوحش يخلي سيدنا محمد يعمل اي شر أبدا .
فضل سيدنا محمد عليه الصلاة و السلام عايش مع حليمة ... لغاية لما حصلت حاجة غريبة ...!!
الأطفال في البادية كانوا بيحبوا يلعبوا مع بعض ... و بيحبوا يلعبوا مع سيدنا محمد
.ففي يوم من الأيام راح الأطفال كلهم و معاهم سيدنا محمد يلعبوا ورا البيت ...بيت حليمة السعدية ....عارفين إيه اللي حصل ؟؟
ربنا خلي ملاك .....ملاك شكله جميييل .... شكل الراجل الطيب ...ولابس هدوم لونها أبيض و نضيفة ... يروح عند الولاد اللي بيلعبوا ....
راح الملاك عند سيدنا محمد و هو بيلعب ... و خلاه ينام ... و دخل إيده بالراحة خااالص جوه صدره ...... و أخد حاجه من قلبه ....حاجة صغيرة جدا ....
اسمها ( مضغة ) .... و قال لسيدنا محمد : أنا أخدت الحاجة دي من قلبك عشان قلبك يبقي أطيب (أطهر ) قلب والشيطان ما يقدرش يضايقك أبدا .... ولا يقدر يخليك تعمل اي شر .
و مشي الملاك ... ( طب عمل كده إزاي ؟ ...عشان ده ملاك من عند ربنا و ربنا هو اللي علمه يعمل كده ) .
بس الولاد التانيين خافو أوي ... افتكروه راجل شرير ... و افتكروه بيؤذي سيدنا محمد ... فطلعوا يجروا بسرعة و هما خايفين ...و راحوا علي حليمة
.... و قالولها : الحقي ...الحقي ..محمد اتقتل !!.. محمد اتقتل !! ...فيه واحد جه و موته !!!
حليمة خافت أوي علي محمد .... و طلعت تجري بسرعة تدور عليه .... لقيته واقف
ووشه مخضوض .... فقالت له : متخافش ...أنا هرجعك عند والدتك .
حليمة كانت بتحبه أوي بس خافت عليه ....لأنها مكنتش تعرف إن ده ملاك طيب ...و افتكرت إن فيه حد عاوز يؤذيه .
حليمة خدته بسرعة عند والدته ... و قالتلها : أنا هرجعلك محمد !
والدته استغربت أوي ... و قالت لها إيه اللي حصل ؟؟
حليمة قالتلها : بصراحة أنا خفت عليه ... و حكت لوالدته كل اللي حصل .
لكن والدت قالتلها : متخافيش .... أنا عارفة إن ابني ده مش طفل عادي ...
و لما كنت حامل و كان هو لسه جوة في بطني ..كنت دايما لما أنام أحلم حلم جميل .. إن فيه نور جميييل بيخرج من جسمي و بينور الدنيا كلها .... أنا حاسة ان ابني محمد لما يكبر ... مش هيبقي إنسان عادي .... لأ ... ده هيبقي إنسان يعلم الدنيا كلها .
اللهم صل علي سيدنا محمد.
إقرأ أيضا:
السيرة النبوية بالعامية للأطفال
تعليقات
إرسال تعليق