السيرة النبوية بالعامية للأطفال
السيرة النبوية بطريقة رائعة لأولادكم احكوهالهم وعلموهم
الحلقة الاولي :
بسم الله الرحمن الرحيم
نتوكل على الله ونبدأ
كان ياما كان .... و ما يحلي الكلام غير بذكر النبي عليه الصلاة و السلام ...
(الولاد الحلوين يقولوا إيه ؟) ............ عليه الصلاة و السلام .... ممتازين !
مين يا أولاد أحسن واحد في الدنيا ؟ .... سيدنا محمد
سيدنا محمد ... هو اللي ربنا اختاره عشان يعلمنا الصح و الغلط ....و الحلال و الحرام .
ربنا اختار سيدنا محمد علشان يعلمنا الأعمال الطيبة و الأخلاق الجميلة .
و يعلمنا دينا الإسلام ....
واللي هيحب سيدنا محمد و يسمع الكلام اللي ربنا علمه لسيدنا محمد ... ربنا هيحبه .... و هيدخله الجنة .
والجنة دي أحلي مكان ... اللي فيه كل حاجة و أي حاجة احنا عاوزينها ... ومهما فكرنا في الجنة.... الجنة برضه هتبقي أحلي من
تفكيرنا !!!!
كان زمان زماااان ........ سيدنا إبراهيم بيبني الكعبة و معاه ابنه اسماعيل ....
سيدنا إبراهيم و هو بيبني الكعبة ..... و قف يدعي ربنا ... إنه يبعت للناس ....واحد ... رسول ....يعلمهم الصح و الغلط و الحلال
و الحرام ...... عشان يخليهم ناس كويسين و طيبين و بيعملوا الخير ..... فربنا أستجاب الدعاء ...
واختار سيدنا محمد ....إنه يكون المعلم ... .... اللي يعلم كل الناس أوامر ربنا .
أبو سيدنا محمد ......كان اسمه ايه ؟
. عبد الله ابن عبد المطلب
( لازم الطفل يردد الاسم)
و أمه كان اسمها ايه؟؟ ................. آمنة بنت وهب .......(خليه يقول وراكي )
سيدنا محمد لما كان لسه جوة بطن أمه ..... مات أبوه اللي هو اسمه ايه؟؟
عبد الله ...... مات و مكنش شافه لأنه مكنش لسه أتولد ........... عارفين
سيدنا محمد أتولد إمتي؟؟ .... أتولد عام الفيل ....( يعني في نفس السنة اللي أبرهة الشرير كان عايز يهدم الكعبة
بالفيل الضخم ... بس ربنا عاقبه و كل الجنود الأشرار اللي كانوا معاه ... و مقدرش يهدم الكعبة ).....
أول لما أمه اسمها إيه؟؟
(آمنة بنت وهب ) ولدته نادت علي جده ....... أبو أبوه .... اسمه عبد المطلب...شافه ....لقاه طفل شكله جميل أوي ..... فأم سيدنا
محمد قالت لجده ...
أنا لما كنت بنام كنت بحلم حلم جميل أوي ...كنت بشوف نور بيخرج من جسمي ... و بينور الدنيا كلها ....
فجده فرح أوي و حس إن الطفل ده هيبقي مش طفل عادي ...و إنه لما يكبر هيعلم الدنيا كلها و هيخلي الناس تشوف الحاجات الصح
زي النور اللي بيخلينا نشوف كل حاجة في حياتنا .
جده قال .... أنا هسميه محمد !!!! ......مكنش فيه حد ساعتها اسمه محمد خاااالص
.. فالناس سألته : يعني إيه محمد ؟؟؟ .... قالهم يعني ربنا في السماء يحبه و يحب أخلاقه الجميله ... و الناس في
الأرض تحبه و تحب أخلاقه الجميلة .
..... اللهم صل علي سيدنا محمد .......
اقراء ايضا
تعليقات
إرسال تعليق